Dara Keudee Kupi

Assalamu’alaikum saleum ulon brie, keu akhi ukhti tuha ngon muda.

Saleum nyan sunat geukheun le nabi, nyan ban neurawi saidil ambiya.

Lon keu neuk sapa abi ngon ummi, ban sigom negeri seluruh donya.

Nariet lon peutroh haba lon rawi, keu ulon neubri restu mulia.

Ca’e lon peu phon ulon mulai, simak beu rapi ban mandum gata.

Malam nyoe di lon meuheut keu kupi, jak ngon relasi meuk nonton bola.

Laju lon peu to bak Ie Teh Kupi, sinan hai Baidawi teumpat biasa.

Teuma di ulon hireun han sakri, ureung wara-wiri bak jalan raya.

Aleh hoe geujak peu ka teurjadi, Allahu Rabbi lon teupeu hana.

(Hehe.. padahai droe bagian dari ureung nyan cit.)

Leuh nyan yang aneh hai bang Kafrawi, na deuh sinyak Ti aneuk bang Baka.

Aleh ho di jak sinyak Meulati, ka deungon bang Li di likot honda.

Ji duk get that rab hana seupasi, di singklet gaki peu ek uram pha.

“beukong ka mumat” geukheun le bang Li, seunyom pih geubie geu keudep mata.

Na siat leuh nyan honda berhenti, lam keudee kupi geu tamong dua.

Adek boh hate di peusan Pulpy, karat di bang Li peusan jus mangga.

Geu meu poh cakra bak keudee kupi, geu nonton tivi sambil meucinta.

Leupah that aneh jareung terjadi, lam keudee kupi na aneuk dara.

Aleh tan sadar meupeukeuh dali, peu but si nyak Ti sajan abuwa.

Meunan di Aceh jinoe teurjadi, han peu ta ungkie nyan sit atra na.

Alasan gata peugah emansipasi, tapi hai dek Ti mandum na cara.

Bek lagee galak ta mat kendali, sayang bungong punti maruwah gata.

Kon ulon sexist bak lon meurawi, kon ulon benci keu gata dara.

Tapi lon sayang keu gata ukhti, yang ta ikuti nyan ata lua.

Budaya Aceh kon meunan teukeudi, sama ta peulajari budaya bangsa.

Inong Islam geuyu jaga diri, bak but meurugi ta tinggai sigra.

Bek that ta turot gaya si Britney, atau si Jolie idola gata.

Mulai jinoe jak ta meujanji, yang tan terpuji peu weh segera.

Nyoe karena sayang keu gata tari, dinda meuwangi bek sampe mala.

Et no keuh mantong ulon akhiri, meu’ah lon pintai nyoe salah kata.

Banda Aceh, 03 April 2012

MZT